Bergsdalstunet på Lid i Bergsdalen i Vaksdal kommune har satsa stort på småskala mat og reiseliv i tilknytning til gardsdrifta.

Bergsdalstunet er drive av ekteparet Olaug Fagerbakke og Helge Terje Fosse. Med på laget har dei òg dei fire borna sine. Garden har 15 mjølkekyr og 12 sauer. I tillegg driv dei med Inn på Tunet.

Ekteparet har no pussa opp Gamlefloren og gjort han om til kurs- og møtelokale. Dei har investert i ein italiensk vedfyrt steinomn, og kjøkkenet kan og brukast til partering av kjøt og til produksjon av kjøtvarer. No satsar dei på servering, overnatting, kurs/konferansar og ulike arrangement (bryllaup, bursdagar, konsertar).

Garden har fått mykje god omtale i lokalpressa. Sjå mellom anna artikkel frå avisa Hordaland som er vedlagt nedanfor.

Ynskjer ein å overnatte, er dette mogleg i Vikinghuset på garden for mindre grupper, eller i Bergsdalshytta for større grupper.

Olaug og Helge Terje er opptekne av å vere eit godt vertsskap med hjarta for god kvalitet og gode matopplevingar. Det meste som vert servert på Bergsdalstunet er frå eigen gard eller området rundt. Ein kan få kjøpa med seg både pinnekjøt som er salta, røykt og tørka i eldhus på "gamlemåten" og korv og karbonade av kalv. Dei held òg kurs i baking og steiking i steinomnen, samt kurs i korving.

Både Osterfjorden næringssamarbeid, landbruksavdelinga hjå Fylkesmannen og Innovasjon Norge har vore gode hjelparar i arbeidet med å realisere Gamlefloren.

Utover hausten skjer det spanande ting på Bergsdalstunet. Mellom anna skal det arrangerast blueskonsert i oktober. Ein kan finna meir informasjon på nettstaden til Bergsdalstunet.

Ta turen og opplev vestlandslandbruket på sitt beste!

Bileta er tekne av fotograf Petter Solheim.